لَیَّہ میں سیلابی صورتحال نہیں، سمرا نشیب اور تھند کلاں میں دریائی کٹاؤ کے خلاف حفاظتی اقدامات جاری: ضلعی انتظامیہ

لَیَّہ: ضلعی انتظامیہ نے تحصیل لَیَّہ کے موضع **سمرا نشیب** اور **تھند کلاں نشیب** میں جاری دریائی کٹاؤ کے حوالے سے بعض ٹی وی چینلز پر نشر ہونے والی خبروں کی وضاحت کرتے ہوئے کہا ہے کہ ضلع کے نشیبی علاقوں میں اس وقت کسی قسم کی سیلابی صورتحال موجود نہیں، تاہم دریائی کٹاؤ کے تدارک کے لیے حفاظتی اور امدادی اقدامات مسلسل جاری ہیں۔

ضلعی انتظامیہ کے مطابق دریائی کٹاؤ کے مستقل حل کے لیے حفاظتی منصوبہ 22 مئی 2026 کو کمشنر آفس کے ذریعے **پی ڈی ایم اے** کو ارسال کیا جا چکا ہے، جبکہ*10 جولائی 2026 کو کابینہ کمیٹی برائے ڈیزاسٹر مینجمنٹ کے اجلاس میں بھی اس منصوبے پر غور کیا گیا۔ منصوبے کی منظوری اور فنڈز کے اجرا کے بعد حفاظتی سٹرکچر کی تعمیر کا آغاز کیا جائے گا۔

انتظامیہ نے بتایا کہ احتیاطی تدابیر کے تحت متاثرہ آبادی کو محفوظ مقامات پر منتقل کر دیا گیا ہے، جبکہ متاثرہ خاندانوں کو عارضی رہائش کے لیے خیمے فراہم کیے جا چکے ہیں۔ ریسکیو 1122 کا امدادی کیمپ گزشتہ ایک ماہ سے مسلسل فعال ہے، جبکہ ریونیو اور محکمہ انہار کی ٹیمیں دریائی صورتحال کی مسلسل نگرانی کر رہی ہیں۔

مزید برآں دریائی کٹاؤ سے متاثرہ سرکاری اسکول کا سامان مقامی کمیونٹی کی جانب سے فراہم کردہ متبادل جگہ پر اسکول مینجمنٹ کونسل کی مشاورت سے منتقل کیا جا رہا ہے تاکہ طلبہ کی تعلیمی سرگرمیاں متاثر نہ ہوں۔

ضلعی انتظامیہ نے شہریوں سے اپیل کی ہے کہ غیر مصدقہ اطلاعات پر یقین نہ کریں اور صرف سرکاری ذرائع سے جاری کردہ معلومات پر اعتماد کریں۔