لیہ: ممبر صوبائی اسمبلی سمعیہ عطاء شہانی نے سیف سٹی لَیَّہ کا دورہ کیا، جہاں منیجر سیف سٹی عبدالاحدنے انہیں منصوبے کی مجموعی کارکردگی، جدید مانیٹرنگ سسٹم اور شہریوں کے تحفظ کے لیے کیے جانے والے اقدامات پر تفصیلی بریفنگ دی۔
بریفنگ کے دوران بتایا گیا کہ وزیراعلیٰ پنجاب مریم نواز شریف کے ویژن "محفوظ پنجاب” کے تحت پبلک ٹرانسپورٹ گاڑیوں پر **کیو آر پینک بٹن نصب کیے جا رہے ہیں تاکہ کسی بھی ہنگامی صورتحال میں مسافر فوری طور پر متعلقہ اداروں سے رابطہ کرکے بروقت امداد حاصل کر سکیں۔
ممبر صوبائی اسمبلی کو ایمرجنسی رسپانس سسٹم، جدید سرویلنس ٹیکنالوجی، سیف سٹی کی مانیٹرنگ استعداد اور شہریوں کے جان و مال کے تحفظ کے لیے اختیار کیے گئے اقدامات سے بھی آگاہ کیا گیا۔
اس موقع پر سمعیہ عطاء شہانی نے کہا کہ وزیراعلیٰ پنجاب مریم نواز شریف کی قیادت میں جدید پولیسنگ، عوام کے جان و مال کے تحفظ اور شہریوں کو محفوظ ماحول کی فراہمی کے لیے مؤثر اقدامات کیے جا رہے ہیں۔ انہوں نے کہا کہ”محفوظ پنجاب”کے ویژن کے تحت سیف سٹی منصوبہ جدید اور پُرامن پنجاب کی جانب ایک اہم پیش رفت ہے۔
انہوں نے ہدایت کی کہ پبلک ٹرانسپورٹ میں کیو آر پینک بٹن کی تنصیب کے عمل کو مزید تیز کیا جائے تاکہ مسافروں کو محفوظ سفر کی سہولت میسر آئے اور کسی بھی ہنگامی صورتحال میں فوری امداد کی فراہمی یقینی بنائی جا سکے۔
سمعیہ عطاء شہانی نے سیف سٹی لَیَّہ کی مجموعی کارکردگی کو سراہتے ہوئے کہا کہ جدید ٹیکنالوجی کا مؤثر استعمال جرائم کی روک تھام، شہریوں کے جان و مال کے تحفظ اور قانون نافذ کرنے والے اداروں کی بروقت کارروائی کو مزید مؤثر بنانے میں اہم کردار ادا کر رہا ہے۔
