**پشاور:** خیبر پختونخوا کے مختلف اضلاع میں موسلادھار بارشوں، فلیش فلڈ اور سیلابی ریلوں نے تباہی مچا دی، جہاں گزشتہ 24 گھنٹوں کے دوران مختلف حادثات میں **12 افراد جاں بحق** جبکہ **14 افراد زخمی** ہو گئے۔
ریسکیو حکام کے مطابق ضلع خیبر کے علاقے لنڈی کوتل میں 4 اور جمرود میں 2 افراد سیلابی ریلوں میں بہہ کر جان کی بازی ہار گئے۔ طورخم کی جانب جانے والا ایک افغان خاندان بھی سیلابی ریلے کی زد میں آ گیا، جس میں سوار 16 افراد میں سے 13 کو بحفاظت ریسکیو کر لیا گیا، جبکہ 3 افراد جاں بحق ہو گئے۔
ریسکیو ٹیموں نے پاک افغان شاہراہ پر پھنسنے والی 100 سے زائد گاڑیوں کو محفوظ مقامات پر منتقل کر دیا ہے، جبکہ متاثرہ علاقوں میں امدادی کارروائیاں جاری ہیں۔
دوسری جانب مانسہرہ، وادی نیلم، اپر دیر اور وادی کاغان میں شدید بارشوں، کلاؤڈ برسٹ اور مڈ سلائیڈنگ کے باعث مکانات، دکانوں، فصلوں اور سڑکوں کو نقصان پہنچا ہے۔ جھیل سیف الملوک جانے والی سڑک پر بھی ٹریفک کی روانی متاثر ہوئی۔
پی ڈی ایم اے کے مطابق بارشوں اور فلیش فلڈ سے 14 مکانات متاثر ہوئے، جن میں ایک مکمل طور پر تباہ جبکہ 13 کو جزوی نقصان پہنچا۔ جاں بحق افراد میں 6 مرد، 5 بچے اور ایک خاتون شامل ہیں۔ گلگت بلتستان کے ضلع استور میں بھی طوفانی بارشوں کے بعد سیلابی صورتحال کے باعث گھروں، فصلوں اور رابطہ سڑکوں کو نقصان پہنچا ہے۔
