**اسلام آباد:** وفاقی حکومت نے گریڈ 1 سے 16 تک کے ملازمین کے لیے ٹائم سکیل پالیسی کے حوالے سے اہم فیصلہ کرتے ہوئے طریقہ کار کو مزید آسان بنانے کا اعلان کر دیا ہے۔
وزارت خزانہ کی جانب سے جاری کیے گئے نئے مؤقف کے مطابق 10 سالہ سروس مکمل کرنے والے اہل وفاقی ملازمین کے لیے پہلے ٹائم سکیل کے حصول کی راہ ہموار کر دی گئی ہے۔ اس کے علاوہ بی پی ایس 16 میں ترقی پانے والے اسسٹنٹس بھی ٹائم سکیل کے اہل ہوں گے، جبکہ ایکس پاکستان لیو اور ہاف ایوریج پے پر موجود اہل ملازمین کو بھی اس سہولت سے مستفید ہونے کا حق حاصل ہوگا۔
وزارت خزانہ نے ٹائم سکیل سے متعلق موجودہ ابہام دور کرتے ہوئے تمام وفاقی وزارتوں اور اداروں کو نئی ہدایات پر عمل درآمد یقینی بنانے کی ہدایت جاری کر دی ہے۔
حکومت کے مطابق ٹائم سکیل کی منظوری کے لیے متعلقہ اسکیل کمیٹی اور مجاز اتھارٹی کی منظوری لازمی ہوگی۔ اس حوالے سے وزارت خزانہ نے وفاقی ملازمین کے سروس بینیفٹس سے متعلق ایک اہم آفس میمورنڈم بھی جاری کر دیا ہے۔
