لاہور: وزیراعلیٰ پنجاب مریم نواز کی ہدایت پر صوبے بھر کی طالبات کے لیے مفت الیکٹرک بائیک اسکیم 2026 کا آغاز کر دیا گیا ہے، جس کے تحت ایک لاکھ طالبات کو مفت الیکٹرک بائیکس فراہم کی جائیں گی، جبکہ طلبہ کو آسان، سود سے پاک اقساط پر بائیکس دی جائیں گی۔
اس اسکیم کے تحت صرف پنجاب کے ڈگری کالجز اور ہائر ایجوکیشن کمیشن (HEC) سے منظور شدہ جامعات میں زیرِ تعلیم طلبہ و طالبات درخواست دینے کے اہل ہوں گے۔ درخواست گزار کا پنجاب کا مستقل ڈومیسائل، قومی شناختی کارڈ یا ب فارم، موٹر سائیکل ڈرائیونگ لائسنس یا لرنر پرمٹ ہونا ضروری ہے، جبکہ وہ کسی رجسٹرڈ موٹر گاڑی کا مالک بھی نہیں ہونا چاہیے۔
حکومت کے مطابق ہر خاندان سے صرف ایک اہل فرد کو الیکٹرک بائیک فراہم کی جائے گی۔ درخواستیں صرف پنجاب حکومت کے آن لائن پورٹل کے ذریعے وصول کی جائیں گی، جہاں امیدوار اپنی تفصیلات درج کرکے مطلوبہ دستاویزات اپ لوڈ کریں گے۔ بائیکس کی تقسیم شفاف کمپیوٹرائزڈ قرعہ اندازی کے ذریعے کی جائے گی۔
حکام نے شہریوں کو خبردار کیا ہے کہ کسی بھی غیر سرکاری ویب سائٹ یا ایجنٹ پر اعتماد نہ کریں اور صرف سرکاری پورٹل سے معلومات اور درخواست کی صورتحال حاصل کریں۔
