کراچی (لیہ ٹی وی) سندھ حکومت نے صوبے میں جدید، ماحول دوست اور معیاری پبلک ٹرانسپورٹ کے فروغ کے لیے 50 ڈبل ڈیکر اور500 الیکٹرک (EV) بسیں ٹرانسپورٹ نظام میں شامل کرنے کا فیصلہ کر لیا ہے۔
اس حوالے سے سندھ کے سینئر وزیرشرجیل انعام میمن کی زیر صدارت ایک اہم اجلاس منعقد ہوا، جس میں مختلف پبلک ٹرانسپورٹ منصوبوں کے لیے بس ڈپو قائم کرنے کی غرض سے سرکاری اراضی کی فراہمی اور ٹرانسپورٹ پلان کا جائزہ لیا گیا۔
اجلاس میں سیکریٹری ٹرانسپورٹ اسد ضامن، ڈائریکٹر جنرل کراچی ڈیولپمنٹ اتھارٹی آصف جان صدیقی، مختلف اضلاع کے ڈپٹی کمشنرز اور متعلقہ محکموں کے اعلیٰ حکام نے شرکت کی۔
اجلاس کے دوران حکام نے بسوں کی پارکنگ، آپریشن اور مستقبل کے ماس ٹرانزٹ منصوبوں کے لیے درکار اراضی سے متعلق تفصیلی بریفنگ دی، جبکہ مختلف اضلاع میں دستیاب سرکاری اراضی اور مجوزہ مقامات کا بھی جائزہ لیا گیا۔
شرجیل انعام میمن نے اجلاس سے خطاب کرتے ہوئے کہا کہ **50 ڈبل ڈیکر اور500 الیکٹرک بسوں کی شمولیت سے سندھ کے ٹرانسپورٹ نظام میں نمایاں بہتری آئے گی۔ انہوں نے تمام ڈپٹی کمشنرز کو ہدایت کی کہ وہ اپنے اپنے اضلاع میں دستیاب خالی سرکاری اراضی کی نشاندہی کریں تاکہ مستقبل کے ماس ٹرانزٹ منصوبوں کے لیے جدید بس ڈپو قائم کیے جا سکیں۔
انہوں نے کہا کہ سندھ حکومت شہریوں کوجدید، آرام دہ، محفوظ اور ماحول دوست پبلک ٹرانسپورٹ فراہم کرنے کے عزم پر قائم ہے اور کوشش کی جا رہی ہے کہ نئی بسیں جلد از جلد عوامی خدمت کے لیے سڑکوں پر لائی جائیں۔
