ملتان(لیہ ٹی وی)ایڈیشنل چیف سیکرٹری ساوتھ پنجاب فواد ہاشم ربانی نے کہا ہے کہ بچوں کی فلاح و بہبود اور ان کے حقوق کا تحفظ حکومت پنجاب اور یونیسف کا مشترکہ وژن ہے۔حکومت کی کوشش ہے کہ معاشی ناہمواریوں کی وجہ سے کوئی بچہ پیچھے نہ رہ جائے۔یہ بات انہوں نے جنوبی پنجاب میں بچوں کی فلاح و بہبود بارے جائزہ اجلاس سے خطاب کرتے ہوئے کہی۔ اجلاس میں یونیسف کےپاکستان میں نمائندہ عبداللہ فاضل اور جنوبی پنجاب کے سیکرٹریز اور سپیشل سیکرٹریز نے شرکت کی۔ایڈیشنل چیف سیکرٹری نے کہا کہ تعلیم ہر بچے کا بنیادی حق ہے اسی لئے جنوبی پنجاب میں” کوئی بچہ سکول سے باہر نہیں رہے گا ” مہم شروع کی گئی ہے۔ انہوں نے کہا کہ بچوں میں غذائی قلت دور کرنے کے لئے جنوبی پنجاب کے پسماندہ اضلاع کے سکولوں میں چیف منسٹر نیوٹریشن پروگرام کے تحت روزانہ دودھ فراہم کیا جارہا یے۔ فواد ہاشم ربانی نے بتایا کہ جنوبی پنجاب مدر اینڈ چائلڈ ہسپتال کے چار بڑے منصوبے زیر تکمیل ہیں۔انہوں نے مزید کہا کہ خطے میں پینے کے صاف پانی اور سیوریج سہولیات کو وسعت دینے کی ضرورت ہے۔ پاکستان میں یونیسف کے نمائندے عباللہ فاضل نے بتایا کہ حکومت پنجاب بچوں کی فلاح کے منصوبوں بارے ٹیکنیکل سپورٹ فراہم کررہا ہے۔ان کا کہنا تھا کہ سرکاری پرائمری سکولوں میں معیار تعلیم کو مانیٹر کرنے کی ضرورت ہے۔عبداللہ فاضل نے بتایا کہ ضلع راجن پور میں حکومت کی کاوشوں کے نتیجہ میں بچوں کی شرح اموات میں کمی واقع ہوئی ہے۔اجلاس میں سیکرٹری سروسز انجینئر امجد شعیب خان ترین، سپیشل سیکرٹری لائیوسٹاک اظفر ضیاء،سیکرٹری بورڈ آف ریونیو مہرخالداحمد، سپیشل سیکرٹری ہائر ایجوکیشن سرفراز احمد، سپیشل سیکرٹری جنگلات رانا رضوان قدیر، سپیشل سیکرٹری سی اینڈ ڈبلیو آفتاب پیرزادہ اور سپیشل سیکرٹری ہاوسنگ رانا سلیم خان نے شرکت کی۔تعلیم، صحت، زراعت اور ایری گیشن ڈیپارٹنمنٹ کے ایڈیشنل سیکرٹریز بھی اجلاس میں موجود تھے۔
