لیہ (نمائندہ لیہ ٹی وی )پنجاب فوڈ اتھارٹی نے پولیس اور محکمہ لائیو سٹاک کے ہمراہ چک 139 اے میں قائم غیر قانونی سلاٹر ہاؤس پر مشترکہ کارروائی کرتے ہوئے 500 کلو گرام بدبودار اور ناقص گوشت برآمد کر کے موقع پر تلف کر دیا۔ویٹرنری ڈاکٹر نے معائنے کے بعد گوشت کو انسانی صحت کے لیے انتہائی مضر قرار دیا، جس کے بعد فوڈ اتھارٹی کی مدعیت میں غیر قانونی سلاٹر ہاؤس کے مالک کے خلاف مقدمہ درج کر لیا گیا۔ڈی جی پنجاب فوڈ اتھارٹی راجہ منصور احمد نے کہا کہ وزیراعلیٰ پنجاب کی خصوصی ہدایات پر بیمار اور مردہ جانوروں کا گوشت فروخت کرنے والوں کے خلاف بلاامتیاز کارروائیاں جاری ہیں۔ انہوں نے واضح کیا کہ عوام کو محفوظ اور معیاری خوراک کی فراہمی پنجاب فوڈ اتھارٹی کی اولین ترجیح ہے اور قانون کی خلاف ورزی کرنے والوں سے سختی سے نمٹا جائے گا۔
