اسلام آباد (لیہ ٹی وی) صدر آصف علی زرداری نے ہفتہ کو شمالی وزیرستان کے علاقے سپن وام میں دہشت گردوں کے خلاف کامیاب آپریشن پر سیکورٹی فورسز کو خراج تحسین پیش کیا جس کے نتیجے میں 6 خوارج دہشت گرد مارے گئے۔ایوان صدر سے جاری بیان میں آصف زرداری نے پاک فوج کے بہادر جوانوں کو خراج تحسین پیش کیا جنہوں نے دہشت گردوں کے خلاف جنگ میں اپنی جانوں کا نذرانہ پیش کیا۔انہوں نے لیفٹیننٹ کرنل محمد علی شوکت اور دیگر فوجیوں کے جذبہ حب الوطنی کو سراہا جنہوں نے وطن کے دفاع کے لیے اپنی جانوں کا نذرانہ پیش کیا۔صدر نے دہشت گردوں کے خلاف آپریشن جاری رکھنے کے عزم کا اظہار کیا۔انہوں نے شہید فوجیوں کے اہل خانہ سے دلی تعزیت کا اظہار کیا اور جنت الفردوس میں تمام شہداء کے درجات کی بلندی کے لیے دعا کی۔ انہوں نے اللہ تعالیٰ سے دعا کی کہ وہ سوگوار خاندانوں کو یہ صدمہ ہمت سے برداشت کرنے کی توفیق عطا فرمائے۔
