لَیَّہ: ڈسٹرکٹ ایجوکیشن آفیسر (ڈی ای او) لَیَّہ گل شیر نے گورنمنٹ بوائز پرائمری سکول کوٹلہ حاجی شاہ اور گورنمنٹ گرلز ہائی سکول 117 اے ٹی ڈی اے میں قائم ایف ایل این (FLN) کیمپس کا اچانک دورہ کیا اور تعلیمی سرگرمیوں کا جائزہ لیا۔
دورے کے دوران انہوں نے اساتذہ اور طلبہ کی حاضری، بچوں کے تخلیقی کام، ہیپی لرننگ سرگرمیوں اور مجموعی تدریسی ماحول کا تفصیلی معائنہ کیا۔ ڈی ای او نے ان بچوں سے متعلق بھی معلومات حاصل کیں جو کسی وجہ سے سکول میں داخل نہیں ہو سکے یا تعلیم چھوڑ چکے تھے، جبکہ انہیں دوبارہ سکولوں میں داخل کرنے کے لیے کیے گئے اقدامات کا بھی جائزہ لیا۔
اس موقع پر گل شیر نے کہا کہ وزیراعلیٰ پنجاب **مریم نواز شریف** کے ویژن کے مطابق ہر بچے کو معیاری تعلیم کی فراہمی محکمہ تعلیم کی اولین ترجیح ہے۔ انہوں نے کہا کہ ایف ایل این کیمپس کا مقصد بچوں کو کھیل ہی کھیل میں مؤثر انداز سے سیکھنے کے مواقع فراہم کرنا، سکول سے باہر بچوں کو دوبارہ تعلیمی دھارے میں شامل کرنا اور تعلیمی طور پر کمزور طلبہ کی خصوصی تعلیمی معاونت کرنا ہے۔
انہوں نے اساتذہ کو ہدایت کی کہ بچوں کی سو فیصد حاضری یقینی بنانے اور تعلیمی معیار میں مزید بہتری کے لیے بھرپور محنت جاری رکھی جائے۔ آخر میں انہوں نے اس عزم کا اظہار کیا کہ "سرکاری سکولز، معیاری سکولز کے تصور کو عملی جامہ پہنانے کے لیے تمام دستیاب وسائل بروئے کار لائے جائیں گے۔
