22 جنوری لیہ ٹی وی: آئی سی سی چیمپئنز ٹرافی 2025 کے لیے بھارتی کرکٹ ٹیم کی جرسی پر ایونٹ کے لوگو میں پاکستان کا نام شامل ہوگا۔ بھارتی کرکٹ بورڈ نے پاکستان کے نام کے ساتھ ’لوگو‘ والی شرٹ پہننے کی تصدیق کر دی ہے۔
سیکریٹری بھارتی کرکٹ بورڈ دیواجیت سائیکیا نے کہا ہے کہ بھارتی ٹیم آئی سی سی قوانین کے مطابق چلے گی، اور چیمپئنز ٹرافی کے لیے منظور شدہ لوگو ہی جرسی پر استعمال ہوگا۔
بھارتی میڈیا نے دعویٰ کیا تھا کہ بھارتی ٹیم کی جرسی پر پاکستان کا نام نہیں ہوگا، تاہم بی سی سی آئی نے واضح کر دیا کہ آئی سی سی کی گائیڈلائنز پر مکمل عمل کیا جائے گا۔
ذرائع کے مطابق آئی سی سی وفد کے حالیہ دورہ پاکستان کے دوران پی سی بی نے قوانین اور پالیسیوں پر عمل درآمد کی اہمیت پر زور دیا تھا۔ آئی سی سی قوانین کے تحت تمام ٹیموں کے لیے منظور شدہ لوگو کا استعمال ضروری ہے، اور اس کی خلاف ورزی پر کٹ مسترد کی جا سکتی ہے۔
