22 جنوری، لیہ ٹی وی: اینٹی نارکوٹکس فورس (اے این ایف) نے منشیات اسمگلنگ کے خلاف مختلف کارروائیوں میں 5 ملزمان کو گرفتار کر لیا اور 1 کروڑ روپے سے زائد مالیت کی 112 کلو گرام منشیات برآمد کی ہے۔
اے این ایف کے ترجمان کے مطابق، پشاور ایئرپورٹ پر جدہ جانے والے ایک مسافر کے ٹرالی بیگ سے 11.12 کلو گرام آئس برآمد ہوئی۔ اسی دوران، شیخوپورہ کے ہرن مینار انٹرچینج ایم 2 پر ایک گاڑی سے 24 کلو افیون، 70.8 کلو چرس اور 1.2 کلو آئس برآمد کی گئی، جس پر گاڑی سوار ملزم کو گرفتار کر لیا گیا۔
مزید برآں، اسلام آباد کے ایم ون موٹر وے پر ایک مسافر بس میں سوار خاتون سمیت ملزمان سے 1.7 کلو افیون اور 1.2 کلو چرس برآمد کی گئی، جبکہ لاہور میں بحریہ ٹاؤن کے قریب ایک ملزم کے بیگ سے 2.5 کلو کیٹامین برآمد ہوئی۔
ترجمان کا کہنا ہے کہ گرفتار ملزمان کے خلاف انسدادِ منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
